मुंबईत शेतकरी आंदोलन पुकारले जाण्यापूर्वीच राज्य सरकारने पोलिसांच्या माध्यमातून क्रांतिकारी शेतकरी संघटनेच्या नेत्यांवर जोरदार कारवाई सुरू केली आहे. बुलढाणा जिल्ह्यातील सर्व प्रमुख पदाधिकाऱ्यांना रात्रीतून अटक करून आंदोलन उधळण्याचा प्रयत्न केला जात आहे. शेतकरी नेते रविकांत तुपकर भूमिगत झाले असले तरी आंदोलन होणारच, असे त्यांनी ठणकावले आहे.
राजकीय दबावाखाली पोलिसांची कारवाई?
बुलढाणा पोलिसांनी क्रांतिकारी शेतकरी संघटनेचे विनायक सरनाईक, डॉ. ज्ञानेश्वर टाले, सहदेव लाड यांना मध्यरात्री झोपेतून उठवून अटक केली. रविकांत तुपकर यांच्या घरासमोर मोठ्या प्रमाणात पोलिसांचा ताफा तैनात करण्यात आला असून, त्यांची गाडी व चालकदेखील पोलिस ताब्यात घेतल्याचे समजते.
“शेतकरी आंदोलन रोखण्यासाठी सरकार पोलीस यंत्रणेचा वापर करत आहे. पोलिस कुणाच्या इशाऱ्यावर हे सगळं करत आहेत?” असा संतप्त सवाल शेतकरी संघटनांनी उपस्थित केला आहे.
शेतकऱ्यांच्या प्रमुख मागण्या
- सरसकट कर्जमाफी
- पीक विमा मंजुरी
- सोयाबीन आणि कापसाच्या दरवाढीचा फरक भरून काढणे
- शेतकऱ्यांना देण्यात आलेली खोटी आश्वासने पूर्ण करणे
या मागण्यांसाठी १९ मार्च रोजी मुंबईत मोठे आंदोलन होणार होते. मात्र, आंदोलन दडपण्यासाठी राज्य सरकारकडून पोलिसांना पुढे करून दबाव तंत्राचा वापर होत असल्याचा आरोप विरोधकांकडून केला जात आहे.
रात्रीभर शेतकरी नेत्यांची धरपकड
राज्यात विविध भागांमध्ये शेतकरी नेत्यांना अटक करण्याचे सत्र सुरू आहे. बिबी, मोताळा, देऊळगाव राजा, मेहकर, जळगाव जामोदसह अनेक भागांत पोलिसांनी अटकसत्र राबवले आहे.
रात्री १२.३० वाजता: अक्षय पाटील, वैभव जाणे, अजय गिरी (जळगाव जामोद)
रात्री २.०० वाजता: उमेशसिंह रजपूत, प्रदीप शेळके, बंडूभाऊ देशमुख (मोताळा)
रात्री ४.३० वाजता: गणेश गारोळे, हरी आसबे, आत्माराम बंगाळे, समाधान गाडे (मेहकर)
सकाळी ५.०० वाजता: विनायक सरनाईक, भगवानराव मोरे, भारत वाघमारे (चिखली)
अनेक शेतकरी नेत्यांच्या गाड्या जप्त करून त्यांना मुंबईकडे जाण्यापासून रोखण्याचे प्रयत्न सुरू आहेत.
“फडणवीस सरकारला आंदोलनाची भीती!”
राज्य सरकारवर टीका करत शर्वरीताई तुपकर यांनी आंदोलन चिरडण्याच्या प्रयत्नांचा निषेध व्यक्त केला.
“सरकारच्या चुकीच्या आर्थिक धोरणांमुळे तिजोरीत पैसा नाही. कर्जमाफीच्या मुद्द्यावर सरकार अडचणीत येईल म्हणून आंदोलन रोखले जात आहे. पण शेतकरी झुकणार नाहीत!” असे त्यांनी ठणकावले.
आता पुढे काय?
शेतकरी संघटनांनी राज्यभर संतप्त प्रतिक्रिया दिल्या असून, पोलिसी कारवाईला विरोध केला जात आहे. रविकांत तुपकर भूमिगत असले तरी मुंबईतील आंदोलन होणारच, असा निर्धार त्यांनी व्यक्त केला आहे.
राजकीय वातावरण तापले असून सरकारकडून अधिकृत प्रतिक्रिया येणे बाकी आहे. पुढील काही तासांत शेतकऱ्यांच्या प्रतिकाराचे नवे स्वरूप दिसण्याची शक्यता आहे.
