राजकारणात कोण, केव्हा, कुठे जाईल याचा अंदाज बांधणं कठीण असतं. काही महिन्यांपूर्वी ज्यांनी शरद पवारांच्या राष्ट्रवादीत (NCP-SP) प्रवेश केला, तेच नेते आता पुन्हा अजित पवारांच्या राष्ट्रवादीत (NCP-Ajit Pawar) परतण्याच्या तयारीत असल्याची चर्चा रंगली आहे.Narendra Rane यांच्या राजकीय वाटचालीबद्दल चर्चेला उधाण आलं आहे.
शरद पवार गटात मन रमले नाही?
राष्ट्रवादी काँग्रेस (शरद पवार गट) चे नेते नरेंद्र राणे आता परतीच्या मार्गावर असल्याचे संकेत मिळत आहेत. काही दिवसांपूर्वी त्यांनी अजित पवार गटाला सोडून थोरल्या पवारांच्या नेतृत्वाखालील राष्ट्रवादीत प्रवेश केला होता. पण तिथे त्यांचं मन रमलं नसल्याने ते पुन्हा अजित पवार गटात जाणार असल्याची जोरदार चर्चा सुरू आहे.
सुनील तटकरे यांची भेट – प्रवेशाची तयारी?
नुकतीच नरेंद्र राणे यांनी त्यांच्या भावासोबत राष्ट्रवादी काँग्रेसचे प्रदेशाध्यक्ष सुनील तटकरे यांची भेट घेतली. ही भेट निवडणुकीपूर्वी मोठी राजकीय उलथापालथ घडवू शकते. काही महिन्यांपूर्वी त्यांनी शरद पवारांच्या उपस्थितीत पक्षात प्रवेश केला होता, मात्र आता परतीच्या हालचाली सुरू केल्याचे समजते.
अजून प्रवेश निश्चित नाही
तरीही, अजून त्यांच्या पक्ष प्रवेशाची अधिकृत घोषणा झालेली नाही. सूत्रांच्या माहितीनुसार, काही स्थानिक नेते आणि कार्यकर्ते याला विरोध करत असल्याने तारीख निश्चित झालेली नाही. पण मुंबई महापालिकेच्या (BMC) निवडणुकीपूर्वी हा प्रवेश होऊ शकतो.
विधानसभा निवडणुकीपूर्वी बंडखोरी
याआधी नरेंद्र राणे यांनी विधानसभा निवडणुकीपूर्वीही बंडखोरी करत अजित पवार गटाला सोडून शरद पवार गटात प्रवेश केला होता. त्यावेळी त्यांची ही चाल महत्त्वाची मानली जात होती. मात्र, आता भाजप-शिंदे गटाच्या महायुतीला मोठं यश मिळाल्यामुळे अनेक बंडखोर पुन्हा जुन्या गटात परतण्याच्या तयारीत आहेत.
राजकीय रंगभूमीवर नवा डाव?
मुंबई महापालिका निवडणुकीच्या पार्श्वभूमीवर हे सर्व घडत असल्याने राजकीय समीकरणे बदलण्याची शक्यता आहे. नरेंद्र राणे आणि त्यांच्या सहकाऱ्यांनी अजित पवारांच्या राष्ट्रवादीत परतल्यास मुंबईतला सत्ता संघर्ष अधिक तीव्र होईल.
